Først av alt helsar eg dykk i Jesu Kristi namn!
Vi leiarane og alle tilsette i ILCT Mbulu takkar Gud for at vi får vera friske og for at arbeidet her i Tanzania går bra. Vi, iraqw-folk og folk elles i Mbulu, takkar Frøydis og Nora og alle i ILCT Norge for hjelp og støtte til arbeidet her. Dei seier: «Må Gud i enda sterkare grad verna dykk og gi dykk stor nåde!»
Vi fortset med å undervisa iraqw-folket som ikkje kan lesa og skriva (Basic) og opnar nye klassar. I tillegg til Basic fortset vi med å undervisa barnehageborn frå 3-6 år, og vi tek imot nye born.
ILCT Mbulu held også tredagars seminar A (Traditional) for dei som allereie kan lesa swahili, slik at dei kan få læra å lesa og skriva sitt eige språk, iraqw. Og vi takkar for dei mange gode resultata vi får. Etter at korona-nedstenginga var over, fortsette vi med Basic-leseklassane og barnehagen frå juli 2020. I september og oktober heldt vi eksamenar i Basic-avslutningsklassane og hadde festar
med utdeling av vitnemål for alle som var ferdige, i alt 84 elevar. 11 nye Basic-leseklassar har sidan starta opp.
Gleda for oss leiarane er at vi synest arbeidet er så kjekt og at det var så mykje positivt i klassane som hadde avslutning. Det er mange elevar som nå har lært å lesa, skriva og rekna. Når det gjeld barnehagen, får skulen vår mykje skryt. Grunnen er at alle som var ferdige hos oss, kunne lesa og skriva bra då dei starta i første klasse på barneskulen. Vi som arbeider i ILCT saman med andre Mbulu-folk sender stor takk til lærar Frøydis og Nora, og til alle som ber for oss og støttar ILCT Mbulu!
Hjarteleg takk!
Dette verk er lisensieret under en Creative Commons Navngivelse 4.0 Internasjonal lisens
.