Åse Enes går Norge på langs.
Vil starta innsamling til lærebøker til Tanzania-prosjekt
Åse Enes går Norge på langs. No startar ho pengeinnsamling for lærebøker til Frøydis Nordbustad sitt prosjekt i Mbulu.
16. mai kunne ein på nettsida til «Tysnes» lesa at Åse Enes skal gå Norge på langs. På ferjekaien i Våge torsdag 16. mai om morgonen er ho klar til avreise til Nord-Norge. 17. mai er ho på Nordkapp og på Knivskjelodden. Gåturen Nordkapp-Lindesnes er i gang.
Søndag 9. juni er ein merkedag for Norge-på-langs-turen. Då passerer Åse Polarsirkelen, etter å ha tilbakelagt over 1.000 kilometer til fots på vel tre veker.
Ny innsamlingsaksjon
No ynskjer ho at denne merkedagen skal bli starten på ein ny innsamlingsaksjon.
– Eg tenkjer at dette er ein fin anledning til å dra i gang ei pengeinnsamling. At andre kan få glede av at eg er ute og går, og at det skal bli eit delmål med turen min, seier Åse.
Ho vil dra i gang kronerulling til Frøydis Nordbustad sitt prosjekt i Mbulu i Tanzania. Frøydis Nordbustad har via store delar av livet sitt for dei innfødde i Mbulu. Ho har laga skriftspråk for Iraqw-folket, ho har omsett heile Bibleen til Iraqw og ho har starta opp skule og barnehage i Mbulu.
Allereie på kaien i Våge 16. mai signaliserer Åse at ho ynskjer å kunna gleda andre med turen sin. Det er Frøydis Nordbustad sitt skuleprosjekt i Tanzania som då er i tankane hennar.
Åse har sjølv jobba i skuleverket i alle år. Ho veit kor viktig det er med lærebøker.
– Eg veit at det trengst midlar til Frøydis sitt arbeid hos Iraqw-folket. Eg ynskjer å samla inn pengar til prosjektet som del av gåinga mi, og at pengane skal gå til lærebøker, seier Åse.
Vil at fleire skal bidra
Åse Enes har vore lærar «heile» livet. Dei siste åra har ho hatt arbeidsplassen sin på Uggdal skule, ein skule som har vore ein slags venskapsskule med Frøydis Nordbustad «sin» skule i Mbulu.
I mange år gjekk inntektene frå julekonserten ved Uggdal skule til Frøydis sitt arbeid hjå Iraqw-folket.
– Sjølv om eg ikkje har vore tett på prosjektet, har eg vore på basarane som blei skipa til på Tysnes til inntekt for Frøydis sitt arbeid. Eg synest det er eit veldig positivt tiltak. Viss eg no kan bidra til at fleire blir med og støttar dette prosjektet, så er det positivt, seier Åse.
I eit meldingsbrev frå Mbulu i april har Åse fått med seg at A-kursa i Mbulu no stoppar opp fordi det er tomt for lærebøker.
I dag er det ILCT som driftar prosjektet som Frøydis Nordbustad i si tid drog i gang. Dei som vil støtta prosjektet, kan gjera det ved å betala inn til ILCT sin bankkonto: 6005.07.21585, eller på Vipps 504817. Merk gjerne med «Norge på langs».
Nora Klungseth (86), som har vore Frøydis Nordbustad (91) «si høgre hand» i ei årrekkje, vore styreleiar for ILCT-stiftingane, både den i Norge og den i Tanzania. Nora er framleis styreleiar for stiftinga i Tanzania, og held jamleg kontakten med medarbeidarane i Mbulu. Styreleiarvervet for stiftinga i Norge har ho sagt frå seg.
– Heilt fantastisk
– Heilt fantastisk, kommenterer Nora Klungseth når «Tysnes» ringjer for å overbringa siste nytt; om at Åse vil starta pengeinnsamling for lærebøker til ILCT.
– Dette var gladnytt de luxe. Har ho fått med seg at me manglar pengar til lærebøker, legg ho til.
Dette verk er lisensieret under en Creative Commons Navngivelse 4.0 Internasjonal lisens
.